Sa taon ngang ito ang bilang ng sumali sa “Pinakamalikhaing Sinukmani Contest”  ay umabot sa isang daan at tatlumpu’t limang kalahok. At matapos mailatag at ihain ang napakarami at katakam-takam na sinukmani,  ito ay masusing hinatulan ng mga hurado. Kaya’t sa huli ang obra ng Brgy. Balibago ang nakapukaw sa atensyon ng hurado at hinirang na kampeon na may pinakamalaking sinukmani.Isa pa sa naging kapanapanabik na programa na ginanap sa taong ito ay ang Sinukmani Cook Fest. Sa buong kasaysayan ito ang unang pagkakataon na magkaroon  ng ganitong patimpalak sa anibersaryo ng Rosario at ito ay sa ilalim ng pamumuno ni Hon. Mayor Leovy Morpe at sa inisyatibo ng kanyang may bahay, Ms. Elizabeth Morpe. Naging layunin ng patimpalak ay ang maibida hindi lamang ang sikat at pinagmamalaking produkto ng Rosario na sinukmani kundi pati na rin ang mga mukha na naging bahagi na ng kasaysayan ng bayan, nagpayaman sa kultura at lalong nagtaguyod sa sinukmani ng Rosario ang mga huwaran at masisipag na magsi sinukmani. At sa nasabi ngang patimpalak ay nagkaroon ito ng sampung kalahok na galing sa iba’t ibang barangay na batikan na at hinubog na ng panahon sa pagluluto ng sinukmani. Sa huli si Ms. Arlyn Cruzem ng barangay San Roque ang nakahuli sa panlasa ng mga hurado at tinaguriang kauna-unahang kampeon sa Sinukmani Cook Fest ng Rosario.